Hopi hende konosé e historia di George Maduro, ku a fayesé den guera na Oropa. Pero mas di 150 otro hendenan lokal a pèrdè nan bida den e guera aki. Hopi a bira víktima ora ku supmarinonan aleman a torpediá barkunan ku nan tabata traha ariba. I otronan ku tabata aktivo den defensa.

Nos mester di bo yudansa tambe komo públiko. Awor aki nos tin e lista ofishal ku 160 nòmber di tur esnan ku a fayesé den guera. Nos ke duna nan un kara! Si bo tin potrèt di un di e víktimanan aki, nos ta pidi bo trese pa nos pa asina duna honor na tur esnan ku a pèrdè nan bida riba nos plachi ‘ Duna nan un kara.’

Tambe nos ta pone atenshon na e 15 chines ku a mata aki nan Kòrsou, den un choke ku polis despues ku nan tabata den wèlga pa motibu di nan trabou peligroso den barika di barkunan.