Den kuadro di e proyekto ‘Guera na Kòrsou?!’, Archivo Nashonal ta organisando un siklo di charla na kua diferente oradó ta profundisá historia di Segundo Guera Mundial na Kòrsou. E politikólogo lokal Junnes St. Jago a ranka sali ku su charla ‘Kampamentu pa presunan di guera na Bonaire’ riba 12 di mei. Ku diferente potrèt, sifra i asta un poema el a laga tur presente sa di e historia di e alemannan I otronan ku a keda interná na Bonaire ora guera a kuminsá.
Notaris Henri Burgers a duna un charla interesante tokante e transpaso di sia (zetelverplaatsing) di kompania fo’i Hulanda pa Kòrsou ku a krese den ‘Off Shore’ despues Guera.
Historiador Erwin Gibbes a duna un tremendo charla tokante e atakenan di submarinonan na Kòrsou i Aruba.
Allan van der Ree, ku ta fundadó i presidente di Battle Station Blaauw, tabata e último ku a trese e historia di asistensha militar merikano durante guera, 17 yüni último. Van der Ree a estrená algun potrèt di kolekshoná priva di militarnan merikano ku niun hende a mira promé. Un sala yen ku entre otro kònsùl general merikano i e veterano merikano kurasoleño Rudy Dovale. E oudiensia por a tuma nota di tantu e parti militar stratégiko i sosial humano di presensia di 3000 militar merikano na nos isla di 1942 te fin di guera.
Archivo Nashonal ta klousurá e siklo di charla ku in invitado speshal djasabra 11 yüli. A invitá e historiadó militar Jos Rozenburg for di Hulanda pa duna e último charla titulá ‘Oorlog op Curaçao’.
