Ora Segundo Guera Mundial a kuminsá gobièrnu hulandes a hansha pa drecha defensa di nos islanan. For di prinsipio a bira bisto ku espesialmente nos kapasidat di refiná petroli mester di protekshon. A funda ‘Schutterij’, un ehérsito chikí lokal ku durante di e periodo di guera gradualmente tabata tin kasi 3000 miembro.

Den e área aki di nos eksposishon nos ta laga bo sera konosé ku algun di e hòmbernan aki. Mas ku 100 ta na bida i tin hopi di konta. Kana wak potrèt, hèlm i karchi di kastigu di ‘Schutterij’.

Mester a aseptá yudansa militar di otro nashon tambe. Asina guera a kuminsá militarnan britániko a bini Kòrsou i na aña 1942 mas di 1500 militar Merikano a yega Kòrsou pa yuda den defensa, remplasando e británikonan. Nèt na ora pa protehá tankero i otro barkunan kontra atakenan supmarino aleman ku tòg a kosta basta bida.

Binimentu di espesialmente e militarnan Merikano a trese kambionan drástiko. No solamente nan a popularisá kosnan manera di uso di eis, pero tambe a yuda drecha infrastruktura di por ehèmpel aeropuerto Hato. Nos a haña plachinan di heru ku nan a usa pa drecha nos pista di aterisahe pa avionnan di guera.

Banda di armanan ku Merikanonan a usa, nos lo mustra bo kon nan a kana, traha i biba den e pais trópiko aki.